List

Hótel Holt er í raun hótel í listasafni en þar er að finna hluta úr stærsta einkasafni af íslenskri myndlist.

Ástríðusafnarar

Þorvaldur Guðmundsson og Ingibjörg Guðmundsdóttir voru mikið áhugafólk um listir, menningu og sögu og hefur einkasafn þeirra að geyma flesta gimsteina íslenskrar listasögu. Um er að ræða stærsta einkasafn á Íslandi og líklega þó víðar væri leitað, með alls 1560 verkum en þar af eru um 460 verk á Hótel Holti. Það var ákvörðun Þorvaldar og Ingibjargar að hótelið skyldi bera íslenskan svip og frá upphafi hafa húsakynnin verið prýdd íslenskum listaverkum. Listaverkin á Hótel Holti eru tölumerkt og í gestamóttöku er hægt að fá frekari upplýsingar sem og leiðsögn um listasafnið á hótelinu ef óskað er.

 

ÍSLENSK MYNDLIST Á HÓTEL HOLTI

 

FRUMHERJARNIR

Segja má að áhugi Þorvaldar á listaverkasöfnun hafi hafist með vináttu hans og Jóhannesar S. Kjarvals, eins ástsælasta listmálara Íslands. Kynntust þeir þegar Þorvaldur var 17 ára gamall að vinna hjá kjötverslun Sláturfélags Suðurlands og fór með matarsendingar á vinnustofu Kjarvals í Austurstræti. Tókst með þeim mikil og ævilöng vinátta og í einkasafni hjónanna er að finna eitt stærsta safn Kjarvalsverka.  Þar á meðal er  Lífshlaupið,  einstakt myndverk sem Kjarval málaði á veggi vinnustofu sinnar á efstu hæð í Austurstræti 12 á árunum 1929–33. Hluti þess hefur verið endurgert sem ljósmynd  á barnum  í Þingholti. Margar af þekktum andlitsteikningum Kjarvals er að finna á bar hótelsins.

 

Meirihluti þeirra verka sem prýða jarðhæð hótelsins eru málverk og teikningar eftir Jóhannes S. Kjarval  en einnig eru þar málverk annarra frumherja á við Ásgrím Jónsson, Jón Stefánsson, Kristínu Jónsdóttur og Júlíönu Sveinsdóttur. Þar eru jafnframt nokkur áberandi stór tímamótaverk  eins og Konur í saltfiski (1935) eftir Gunnlaug Blöndal,  Áning / Útreiðarfólk (1939) eftir Jón Stefánsson, Konur við síldarsöltun (1940) eftir Jón Þorleifsson, Sveitasæla (c.1955-1960) eftir Gunnlaug Scheving, Töfrar Íslands (1962) eftir Jón Engilberts og tvö verk, Farfuglar (1980) og Án titils (1984) eftir Eirík Smith.

 

 

HÖGGMYNDIR  / SKÚLPTÚRAR

Í anddyri hótelsins eru þrír skúlptúrar. Við lyftuna stendur Friðarengillinn úr bronsi (c.1910), eftir Einar Jónsson og næst aðalinngangi eru Framtíðin (c. 1950-55) og Tónar hafsins (1950)  eftir Ásmund Sveinsson.

 

Á stigapöllum hótelsins eru tveir skúlptúrar úr járni eftir Jón Benediktsson og úr lofti efstu hæðar hangir svifverk úr járni eftir Ásmund Sveinsson. Í Þingholti er bronsverkið Höllin eftir Gerði Helgadóttur og fjögur bronsverk, Heimkoma handritanna, eftir Jón Benediktsson, sem gerð voru að beiðni Þorvaldar og Ingibjargar í tilefni heimkomu hluta handritanna 1971.

Járnhandrið stigans í Þingholti sem liggur niður í fatageymslu staðarins er verk  myndlistarmannsins Jóns Gunnars Árnasonar (1931-1989).

 

 

VEGGMYNDIR / LÁGMYNDIR

Gegnt lyftu á göngum hótelsins eru þrjár stórar lágmyndir úr steinleir sem unnar voru fyrir Hótel Holt hjá leirbrennslunni Glit í Reykjavík.  Á  2. hæð  er verkið Iðnaður (1965) eftir Hring Jóhannesson listmálara  og verkin Sjávarútvegur (1965)  á 3. hæð og Verslun (1965) á 4. hæð eftir Ragnar Kjartansson myndhöggvara.

 

Næst innganginum að Þingholti að sunnanverðu er veggmyndin Ásgarður (1974) eftir Ragnar Kjartansson myndhöggvara. Myndefnið á rætur í norrænni goðafræði og er samsett úr nokkrum hlutum sem unnir eru úr steinleir. Þar má greina að:

 

Óðinn ríður Sleipni, hrafnarnir Huginn og Muninn leiða.

Úlfarnir Geri, Freki og Breki, fylgja eftir.

Einherjar eru förunautar hans.

Þór með hamar sinn bíður þeirra í Þrúðvangi.

 

 

ERLEND MYNDLIST Á HÓTEL HOLTI

 

MÁLVERK OG SKÚLPTÚRAR

Í anddyri  og setustofu hótelsins eru m.a. sjávarmyndir frá ströndum Íslands eftir dönsku listmálarana Carl Locher og  Vilhelm Arnesen, en þeir voru með í ferð Friðriks 8. Danakonungs til Íslands í september 1907. Einnig tvær sjávarmyndir eftir Frants Landt  frá ferð hans til Íslands 1936. Þar er einnig að finna málverkið, Færeyskur sjómaður (1963) eftir færeyska listmálarann S.J. Mikines. Sjávarmynd frá Eyrarsundi eftir danska listmálarann Christian Bogø er staðsett í bókastofu hótelsins.

 

Í Þingholti er að finna elsta málverkið í listasafninu á Hótel Holti, Gudvangen (1883), eftir norska listmálarann  Georg Anton Rasmussen. Í Þingholti eru einnig tvö brons og silfurverk eftir sænska myndhöggvarann Walter Bengtsson, Afródíte (1967) og Stórveldin (1975).

 

 

STEINÞRYKK

Nokkur gömul Íslandskort og 134 steinþrykk (litógrafíur) eftir teikningum M. August Mayer, listamanns úr leiðangri franska náttúruvísindamannsins Joseph Paul Gaimard um Ísland árin 1835 og 1836, setja sterkan svip á ganga hótelsins.

Myndirnar birtust í miklu riti, Voyage En Islande et au Groënland exécuté pendant les années 1835 et 1836  sem gefið var út í París á árunum 1838-1852.  Árið 1986 gaf Bókaútgáfan Örn & Örlygur út bókina Íslandsmyndir Mayers 1836 þar sem allar myndir úr leiðangri Gaimards voru birtar.

Myndirnar á göngum hótelsins eru  einstakar þjóðlífslýsingar frá Íslandi á 19. öld – mannamyndir, híbýli, hlutir, staðarlýsingar og margt fleira.

JÓHANNES S. KJARVAL

Dyrfjöll

Jóhannes S. Kjarval (1885-1972) var einn færasti listmálari Íslands og eru flest verkanna í safninu eftir hann eða um 500 verk sem spanna allt hans tímabil. Kjarval teiknaði og málaði frá unga aldri og sótti sér þekkingu hérlendis eftir föngum. Hann var orðinn 25 ára þegar hann hélt til Kaupmannahafnar til náms með góðri hjálp velgjörðarmanna. Kjarval var aldrei feiminn við að prófa sig áfram í listsköpun sinni. Íslensk náttúra var honum innblástur og skapaði hann í henni dulúðugan heim hulduvera. Íslendingar dáðu Kjarval og eru verk þessa margbrotna listamanns samofin íslenskri þjóðarvitund.

JÓHANNES S. KJARVAL

Dyrfjöll

Jóhannes S. Kjarval (1885-1972) var einn færasti listmálari Íslands og eru flest verkanna í safninu eftir hann eða um 500 verk sem spanna allt hans tímabil. Kjarval teiknaði og málaði frá unga aldri og sótti sér þekkingu hérlendis eftir föngum. Hann var orðinn 25 ára þegar hann hélt til Kaupmannahafnar til náms með góðri hjálp velgjörðarmanna. Kjarval var aldrei feiminn við að prófa sig áfram í listsköpun sinni. Íslensk náttúra var honum innblástur og skapaði hann í henni dulúðugan heim hulduvera. Íslendingar dáðu Kjarval og eru verk þessa margbrotna listamanns samofin íslenskri þjóðarvitund.

ÁSGRÍMUR JÓNSSON

Hvítárvatn og Langjökull

Ásgrímur Jónsson (1876-1958) var frumherji í íslenskri myndlist og sá fyrsti til að gera hana að sínu aðalstarfi. Hann var lærimeistari Kjarvals og þekktastur fyrir landslagsmyndir sínar. Margar þeirra er að finna á hótelinu og verkið Hvítárvatn og Langjökull er staðsett í veitingastað hótelsins.

ÁSGRÍMUR JÓNSSON

Hvítárvatn og Langjökull

Ásgrímur Jónsson (1876-1958) var frumherji í íslenskri myndlist og sá fyrsti til að gera hana að sínu aðalstarfi. Hann var lærimeistari Kjarvals og þekktastur fyrir landslagsmyndir sínar. Margar þeirra er að finna á hótelinu og verkið Hvítárvatn og Langjökull er staðsett í veitingastað hótelsins.

EINAR JÓNSSON

Friðarengill

Einar Jónsson (1874-1954) var fyrsti myndhöggvarinn á Íslandi. Fyrsta listasafn landsins var safnið hans, Hnitbjörg, opnað 1923. Hann var frægur fyrir þjóð- og goðsöguleg minni og í seinni tíð fyrir táknhyggju. Verk hans Friðarengill er að finna í anddyri hótelsins.

EINAR JÓNSSON

Friðarengill

Einar Jónsson (1874-1954) var fyrsti myndhöggvarinn á Íslandi. Fyrsta listasafn landsins var safnið hans, Hnitbjörg, opnað 1923. Hann var frægur fyrir þjóð- og goðsöguleg minni og í seinni tíð fyrir táknhyggju. Verk hans Friðarengill er að finna í anddyri hótelsins.

JÓN STEFÁNSSON

Áning (Útreiðarfólk)

Jón Stefánsson (1881–1962) er einn af frumherjum í íslenskri myndlist og nam í Kaupmannahöfn og París. Hann sótti myndefni sitt einkum í víðáttumikið íslenskt landslag og daglegt líf fólks líkt og málverkið Áning eða Útreiðarfólk, sem hann vann árið 1939 fyrir einn fínasta veitingastaðinn í Kaupmannahöfn, Frascati, ber með sér. Þegar rekstri veitingastaðarins var hætt 1972 keypti Þorvaldur verkið og flutti til Íslands. Síðan þá hefur það sett sterkan svip á veitingasalinn á Hótel Holti.

JÓN STEFÁNSSON

Áning (Útreiðarfólk)

Jón Stefánsson (1881–1962) er einn af frumherjum í íslenskri myndlist og nam í Kaupmannahöfn og París. Hann sótti myndefni sitt einkum í víðáttumikið íslenskt landslag og daglegt líf fólks líkt og málverkið Áning eða Útreiðarfólk, sem hann vann árið 1939 fyrir einn fínasta veitingastaðinn í Kaupmannahöfn, Frascati, ber með sér. Þegar rekstri veitingastaðarins var hætt 1972 keypti Þorvaldur verkið og flutti til Íslands. Síðan þá hefur það sett sterkan svip á veitingasalinn á Hótel Holti.

ÁSMUNDUR SVEINSSON

Tónar hafsins

Ásmundur Sveinsson (1893-1982) var afkastamikill myndhöggvari og þekktur fyrir einföld og formhrein figúratív og abstrakt verk. Í safneigninni eru mörg verk eftir hann, til dæmis Tónar hafsins og Framtíðin við inngang hótelsins.

ÁSMUNDUR SVEINSSON

Tónar hafsins

Ásmundur Sveinsson (1893-1982) var afkastamikill myndhöggvari og þekktur fyrir einföld og formhrein figúratív og abstrakt verk. Í safneigninni eru mörg verk eftir hann, til dæmis Tónar hafsins og Framtíðin við inngang hótelsins.

KRISTÍN JÓNSDÓTTIR

Kaldidalur

Kristín Jónsdóttir (1888-1959) var fyrst íslenskra kvenna til að hefja listnám við Konunglega listaháskólann í Kaupmannahöfn. Kristín er þekkt fyrir kyrralífs- og landslagsmyndir sínar, líkt og verkið Kaldidalur í veitingastað hótelsins.

KRISTÍN JÓNSDÓTTIR

Kaldidalur

Kristín Jónsdóttir (1888-1959) var fyrst íslenskra kvenna til að hefja listnám við Konunglega listaháskólann í Kaupmannahöfn. Kristín er þekkt fyrir kyrralífs- og landslagsmyndir sínar, líkt og verkið Kaldidalur í veitingastað hótelsins.

JÚLÍANA SVEINSDÓTTIR

Hekla

Júlíana Sveinsdóttir (1889-1966) lærði hjá Þórarni B. Þorlákssyni en fór síðar til frekara listnáms við Konunglega listaháskólann í Kaupmannahöfn. Júlíana og Kristín Jónsdóttir voru fyrstar íslenskra kvenna til að gera myndlist að atvinnu sinni. Í safneigninni er meðal annarra málverkið Hekla, sem prýðir móttöku hótelsins.

JÚLÍANA SVEINSDÓTTIR

Hekla

Júlíana Sveinsdóttir (1889-1966) lærði hjá Þórarni B. Þorlákssyni en fór síðar til frekara listnáms við Konunglega listaháskólann í Kaupmannahöfn. Júlíana og Kristín Jónsdóttir voru fyrstar íslenskra kvenna til að gera myndlist að atvinnu sinni. Í safneigninni er meðal annarra málverkið Hekla, sem prýðir móttöku hótelsins.